ʼn Duitse toeris het in Plettenbergbaai in die Wes-Kaap verdrink.
Andrew Ingram, woordvoerder van die Nasionale Seereddingsinstituut (NSRI), sê die 50-jarige Duitser het Woensdagmiddag by die Dunes-karavaanpark by Keurboomstrand verdrink. Ingram sê die man is deur omstanders uit die water gehaal waarna hulle mond-tot-mond-asemhaling toegepas het. Die man is per ambulans na die Plettebergbaai Mediclinic geneem maar is op sy aankoms dood verklaar. Die toeris was op vakansie aan die Tuinroete.