Trein ontspoor na polisie verdagte motor agternasit

Minstens 21 mense is beseer nadat ʼn motor wat deur die polisie agternagesit is van ʼn brug gejaag het en teen ʼn trein gebots het.

ʼn Polisiewoordvoerder, kapt Thulani Zwane, sê die Durbanse metropolisie het ʼn verdagte motor agternagesit toe die bestuurder van die motor glo beheer verloor en deur die brug se relings gebars en op ʼn treinspoor beland het. Zwane sê ʼn aankomende trein kon nie betyds stop nie en het teen die motor gebots naby Reunion-stasie. “Die bestuurder van die motor het uitgeklim en weggehardloop voor die trein teen die motor gebots het,” sê Zwane. ʼn Woordvoerder van ER24, Derrick Banks, sê 21 mense is beseer, waarvan een ernstig. Hy sê die beseerdes het reeds uit die trein geklim en op die treinspoor vir paramedici gewag. Die passasierspooragentskap (Prasa) sê twee waentjies het ontspoor en ernstige skade aangerig.