Tropiese storm maak SA droër – kenner

Die tropiese storm kan dalk binnekort in ʼn volslae orkaan verander. (Foto: Suid-Afrikaanse Weerdiens)

Die tropiese storm wat tans deur die Mosambiekse kanaal beweeg, en dalk binnekort in ʼn volslae orkaan kan verander, sal Suid-Afrika waarskynlik nie tref nie.

Kenners meen egter dat die nat weerstoestande wat met die storm gepaardgaan wel Suid-Afrika se huidige weer – wat betreklik warm en droog is – vererger.

Die Suid-Afrikaanse Weerdiens (SAWD) het vandeesweek só verduidelik nadat dit aan die lig gekom het dat tropiese storm Cheneso die naweek oor die binneland van Madagaskar by die Mosambiekse kanaal inbeweeg het.

Kevin Rae, die weerdiens se hoofweervoorspeller, sê Cheneso word tans geklassifiseer as ʼn matige tropiese storm met ʼn sentrale drukking van 997 hPa (hektopascal).

“Die jongste weervoorspellingmodelle dui daarop dat ʼn lae windskuif, gekombineer met ʼn warm see-oppervlaktemperatuur van 29 °C daartoe kan lei dat Cheneso teen Saterdag tot ʼn ernstige tropiese sikloon kan ontwikkel,” sê hy.

Die tropiese storm het reeds begin versterk en ʼn gemiddelde windsnelheid van 93 km/h is aangeteken. Die storm beweeg in ʼn suidwestelike rigting en sal na verwagting teen Saterdag naby Europa-eiland wees.

“In daardie stadium sal die stelsel waarskynlik op sy mees intense wees, met ʼn gemiddelde windsnelheid van 148 km/h en rukwinde van 185 km/h, waarna dit waarskynlik as ʼn intense tropiese sikloon geklassifiseer sal word,” sê Rae.

“Daar moet wel daarop gelet word dat die beweging van só ʼn stelsel net ʼn paar dae vooruit voorspel kan word, maar in hierdie stadium dui die huidige weervoorspellingmodelle daarop dat die storm nie oor Suid-Afrika sal beweeg nie en dus geen risiko vir die land inhou nie.”

(Foto: Suid-Afrikaanse Weerdiens)

Prof. Hannes Rautenbach, dekaan van die Fakulteit Natuurwetenskappe by Akademia, meen dat die storm wel ʼn uitwerking op Suid-Afrika se weerstoestande kan hê.

“Tot dusver het ons goeie somerreën gehad, maar dit is verbreek met ʼn warm-droë-periode wat teen die begin van Januarie aangebreek het – ʼn tipiese midsomerdroogte wat jaarliks te voorskyn kom,” sê hy.

“In plaas daarvan dat die midsomerdroogte tot ʼn einde gekom het, het die vorming van die tropiese storm veroorsaak dat vog uit Suid-Afrika na die tropiese storm ‘gesuig’ word. Hierdie tekort aan vog oor die land het ook tot gevolg dat die droër toestande nou langer aanhou as wat verwag is. Sou die tropiese storm tot ʼn sikloon versterk, sal nog meer vog verlore gaan.”

Rautenbach verduidelik dat hierdie samevloei van omstandighede veroorsaak dat Suid-Afrika ʼn langer droogtetydperk beleef as wat verwag is.

Hoewel die sogenaamde midsomerdroogte veral belangrik is vir mielieboere (dit is die tyd wanneer die mielieplante blom), is daar wel risiko’s vir die landboubedryf as die droogte langer strek as verwag.

Rautenbach is egter hoopvol dat die kans op goeie reën vir die res van die seisoen nog baie goed is, aangesien die land steeds in ʼn La Niña-weerstelsel is wat verantwoordelik is vir laer temperature en goeie reënval.

“Die storm moet egter eers in die Mosambiekse kanaal uitwoed voordat ons hierdie reën kan verwag.”

Die weerdiens hou intussen die tropiese storm fyn dop vir enige koersverandering.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

Een kommentaar

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.