Twee mans is in ʼn kritieke toestand in die hospitaal nadat hulle Vrydagoggend tydens ʼn beweerde padwoede-aanval in Vereeniging erg aangerand is.
ʼn Woordvoerder van ER24, Vanessa Jackson, sê ʼn geveg het glo uitgebreek tussen die insittendes van twee voertuie op die hoek van Botha en Smutsrylaan. Sy sê vyf mans is beseer, waarvan twee ernstig. Jackson sê daar word vermoed dat die een voertuig dalk voor die ander voertuig ingery het waarna die insittendes begin baklei het. Die drywer en enigste insittende van een van die motors het glo een van die ander vier mans erg beseer. Die ander mans het toe glo die drywer van die ander voertuig erg aangerand. ʼn Verbygaande motoris het glo een van die erg beseerde mans in sy voertuig ingetrek en die deur gesluit tot die paramedici opgedaag het. Die polisie ondersoek die saak.