Twee sterf, ses beseer in Kaapstad-ongeluk

Twee mense is Vrydagaand dood en ses beseer in ʼn ongeluk in Epping in Kaapstad.

Vanessa Jackson, woordvoerder van ER24, sê die bestuurder het glo beheer verloor oor die voertuig waarna dit verskeie kere gerol het. Jackson sê een van die insittendes is op slag dood terwyl ʼn ander later op die toneel aan sy beserings beswyk het. Volgens Jackson het drie van die insittendes ligte beserings opgedoen. “Die ander drie insittendes is ernstig beseer en is na nabygeleë hospitale vervoer vir verdere behandeling.” Geen ander voertuie was in die ongeluk betrokke nie. Die polisie ondersoek die oorsaak van die ongeluk.