Bankkaartdupliseringstoestel
Twee mans wat mense glo wou beroof is Woensdag in ‘n winkelsentrum in Nelspruit deur die Valke in hegtenis geneem.
“Die paar het hulself Woensdag glo as bankbeamptes voorgedoen en by die OTM in die Matsulu-winkelsentrum, Nelspruit, Mpumalanga, gestaan. Hulle het glo aangebied om diegene wat wou geld trek, te help,” het kapt. Paul Ramaloko, woordvoerder van die Valke, gesê. “Na bewering het hulle die bankkaart van een persoon in die ry versoek. Een van die verdagtes het toe glo die kaart op ‘n kaartleestoestel dupliseer.”
“Mense in die ry het agterdogtig geraak en ‘n stryery het ontstaan,” het Ramaloko bygevoeg. Die polisie het by die toneel opgedaag en die mans van die ontstoke skare gered. Hulle is in hegtenis geneem en die polisie het beslag gelê op die toestel.
Die toestel dupliseer inligting glo onwettig van die magneetstrokie aan die agterkant van bankkaarte. Dit kan óf met die hand vasgehou word, óf aan ‘n OTM-masjien gekoppel word.
Die twee mans sal Vrydag in die Kabokweni-landdroshof verskyn op aanklag van bankkaartduplisering en bedrog.
