Die polisie het Dinsdag gerugte ontken dat ʼn groep betogers onderweg is om woonbuurte in Bloemfontein, Vrystaat, in te vaar en te beskadig.
ʼn Boodskap doen sedert Maandag die rondte op sosiale netwerke wat beweer dat die gemeenskappe van Thabong, Botshabelo, Qwa Qwa en Boemfontein na die stad beweeg om verwoesting in gegoede woonbuurte te saai, berig OFM.
Die boodskap beweer dat die optog in samewerking met ʼn mynwerkersunie geskied en dat inwoners vir veiligheidsredes in hul huise moet bly. Billy Jones, ʼn polisiewoordvoerder, het egter aan die radiostasie gesê die gerugte kan nie bevestig word nie. “Ons het lede wat die gerugte ondersoek. Daar is geen rede om paniekerig te raak nie, want daar is nie so ʼn aksie wat plaasvind nie,” het hy gesê.
