Die sekuriteitswagte het Dinsdagmiddag ‘n groep van 30 mans in ‘n mynskag agtervolg. Die mans was glo besig om koperkabels te steel. Die vermeende koperdiewe het die wagte begin jaag en hulle in ‘n ondergrondse kamer vasgekeer. Twee van die veiligheidswagte kon ontsnap en hulp ontbied. “Meer sekuriteitswagte is ontbied om hul kollegas te red. Die wagte is Dinsdagaand omstreeks 23:00 weer na veiligheid gebring,” het kol. Leonard Hlathi, woordvoerder van die polisie, gesê. Volgens Hlathi vermoed die polisie dat die groep mans nog steeds in die myn is. “Geen beserings is aangemeld nie, en ons hoop om binnekort die verdagtes vas te trek,” het Hlathi bygevoeg.
Die polisie en mynbestuur ondersoek die voorval. XCSA is ook tans besig om die risiko vas te stel voordat normale mynaktiwiteit voortgesit word.