Die vermiste 3.5m-lange luislang is Maandag onder ʼn hoop rommel in Sandton opgespoor.
Die slang, genaamd Gabbana en ʼn ander, Dolce, het Woensdag uit hul eienaar, Angi Latimer se huis in Tugelasingel ontsnap nadat hulle deur diefwering geseil en die deurhandvatsel afgedruk het. Dolce is later dieselfde dag in die swembadpompkas gevind. “My tuinier het Gabbana onder ʼn hoop rommel in die tuin opgespoor. Hy was vuil maar ongedeerd en hy het twee paddas gehad wat hom besig gehou het,” het Latimer gesê. Sy sê Gabbana was blind weens die feit dat hy oor sy oë begin vervel het. “Hy is weens vervelling blind, maar sodra die vel afval sal hy weer reg wees.” Latimer sê sy het Gabbana gebad om seker te maak hy het geen beserings opgedoen nie. “Ek is so verlig dat Gabbana nou weer veilig in sy vogtige kamer is.” Latimer het bygevoeg dat, alhoewel die slang vir ʼn week lank nie gevoer is nie, hy nie die paddas geëet het nie. -SAPA
