Sers. Portia Maleka het bevestig dat die seun se suster, Johanna Lebembe, die liggaam as haar boetie, Riaan, uitgeken het. Riaan was ʼn leerling by Laerskool Masakhane in Hammanskraal.
Riaan het verlede week Dinsdag op pad skool toe vermis geraak. “Die kind se ma het haar werkgewer vertel dat haar seun vermis word,” het Maleka gesê. “Die werkgewer het ʼn nuusberig gelees oor die liggaam wat in Silverton opgespoor is en het Maandag die ma gevra of sy al haar kind opgespoor het. Hy het haar toe na die polisie verwys.”
Die ma het haar dogter, Johanna, na die polisie gestuur waar sy haar boetie in die lykshuis uitgeken het.
Riaan se lyk is Vrydagoggend in ʼn veld naby die Silverton Transnet-aanleg deur ʼn verbyganger gevind. Sy keel was feitlik afgesny en hy het steeds sy skooluniform aangehad. Die polisie vermoed dat hy elders vermoor is en sy liggaam toe in Silvertondale afgelaai is.
Niemand is nog in verband met die moord in hegtenis geneem nie.
Lees ook:
Skoolseun se lyk in veld gevind
Vermoorde skoolseun se identiteit nog onbekend