Vermiste visserman se liggaam gevind

‘n Visserman wat Sondag in die see by Bantrybaai in Kaapstad vermis geraak het se liggaam is gevind.

Craig Lambinon, woordvoerder van die Nasionale Seereddingsinstituut (NSRI), sê die 29-jarige man se liggaam is Sondagmiddag deur die polisie se duikeenheid gevind. Die man het vermis geraak kort nadat hy vroeër die Sondag die see binnegegaan het. Lambinon sê die man se liggaam is in die area gevind waar hy die laaste keer lewend deur ooggetuies gesien is. Die polisie het ʼn geregtelike doodsondersoek geopen.