ʼn Vrou wat glo voorgegee het dat sy ʼn studente verpleegster is, het na bewering Dinsdagaand ʼn baba by ʼn hospitaal in die Oos-Kaap gesteel, het die provinsiale departement van gesondheid Woensdag gesê.
Woordvoerder Sizwe Kupelo sê die vrou het die moeder van die baba Dinsdagaand wakker gemaak en haar aangesê om te bad. “Toe die moeder teruggekeer het, het die “verpleegster” en die baba spoorloos verdwyn.” Kupelo sê die moeder is vir geringe komplikasies in die Dora Nzinga-hospitaal opgeneem nadat sy geboorte geskenk het. Hy sê die departement sal ondersoek instel of die “verpleegster” na ander pasiënte omgesien het. Die saak is by die polisie aangemeld.