Video: Minister sê samewerking lei tot afname in misdaad

Die minister van polisie, Nathi Mthethwa, het aan afgevaardigdes by ’n konferensie van die Sekerheidsbedryf-alliansie gesê verbeterde koördinasie en uitruil van inligting het bygedra tot die afname in ernstige misdaad.

Mthethwa sê samewerking tussen die polisie en nagenoeg 8 000 private veiligheidsmaatskappye speel ʼn belangrike rol in die bekamping van misdaad. Mthethwa sê daar is ook suksesse bereik deur behoorlike polisiëring, verandering van wetgewing en die toewyding van beide die polisie en die gemeenskap. Hy sê egter daar is steeds talle uitdagings soos onwettige wapens wat deur sommige veiligheidsmaatskappye gebruik word. Mthethwa het ook onder meer verwys na transitorooftogte wat dikwels gebeur as gevolg van inligting wat aan misdadigers verskaf word deur persone wat in veiligheidsmaatskappye se diens is.