Vier mense is dood en drie ernstig beseer in ʼn ongeluk Saterdagoggend naby Cullinan, oos van Pretoria.
ʼn Woordvoerder van die Tshwane metropolisie, Charmain Louwrens, sê ʼn bakkie se wiel het gebars op die R513 op pad na Cullinan. “Die bestuurder het beheer verloor. Vier mense is op die toneel dood verklaar en drie is in ʼn ernstige toestand na die hospitaal vervoer.” Louwrens sê die bestuurder van die bakkie is vir dronkbestuur in hegtenis geneem. Sy sê die R513 van Mamelodi na Cullinan is gesluit vir opruimingswerk.