Vier mense is dood en vier ander ernstig beseer toe twee motors reg van voor gebots het in Roodepoort, Gauteng.
Jeff Wicks, woordvoerder vir Netcare911, sê die botsing het Sondag in Hambergstraat in Creswell Park plaasgevind. Wicks sê die bestuurder van een van die motors het glo beheer verloor en in aankomende verkeer beland en reg van voor teen die ander motor gebots. Vier insittendes van een van die motors is op die toneel dood verklaar. Die ander twee insittendes was in die wrak vasgekeer en moes met meganiese toerusting verwyder word. Een van die beseerdes is per helikopter na ʼn nabygeleë hospitaal vervoer.