Vliegtuig van nuwe Franse president deur weerlig getref

Francois Hollande het Dinsdag amptelik sy pos as Frankryk se president ingeneem, maar ure later is sy vliegtuig op pad na Berlyn deur weerlig getref.

Na die inhuldigingseremonie het Hollande in sy Falcon 7x-vliegtuig na Berlyn vertrek. Die vliegtuig is kort daarna deur weerlig getref en moes na Villacoublay-lugmagbasis buite Parys terugkeer. Niemand is in die voorval beseer nie. Die president en sy gevolg het kort daarna met ʼn Falcon 900 vertrek. Hollande was uiteindelik een en ʼn halfuur laat vir sy eerste vergadering met Angela Merkel, Duitse kansellier.

Die sosialistiese Hollande is op 6 Mei tot president van Frankryk verkies.