Mvelo Robert Mazibuko
ʼn Gevaarlike krimineel, wat vir ʼn jaar lank soek was, is weer agter tralies nadat die polisie hom Woensdag in Mosambiek aangekeer het.
Kolonel Leonard Hlathi, ʼn woordvoerder van die Mpumalanga-polisie, sê die 33-jarige Mvelo Robert Mazibuko het sowat ʼn jaar gelede uit wettige aanhouding in Tonga ontsnap. Mazibuko was onder polisiebewaking in die Shongwe-hospitaal toe hy ontsnap het. Hy was aangehou vir ʼn reeks kriminele oortredinge, waaronder moord, huisroof en kapings.
“ʼn Grootskaalse soektog is sedert sy ontsnapping van stapel gestuur en harde werk en speurwerk het tot sy inhegtenisname in Mosambiek, waar hy weggekruip het, gelei,” het Hlathi gesê.
Mazibuko moet binnekort in die Nkomazi-landdroshof verskyn. Hy gaan ook aangekla word van ontsnapping uit wettige aanhouding.
