ʼn Geestesversteurde vrou is dood nadat sy in ʼn mangat geval het in Bloemhof, Noordwes.
Lt. Kol. Lesego Metsi, woordvoerder van die polisie, sê die 50-jarige vrou se familie soek sedert Dinsdagaand na haar nadat sy hul huis verlaat het. ‘n Familielid het die vrou se liggaam Woensdag net voor middagete in die oorstroomde mangat opgemerk. “Die vrou het na verwagting nie die mangat gesien nie aangesien dit met water gevul was,” het Metsi gesê. Die vrou se liggaam is omstreeks 15:30 Woensdagmiddag deur lede van die polisie se duikeenheid uit die mangat verwyder. Die polisie ondersoek die saak.
