Vrou vas ná bomdreigement by lughawe

ʼn Vrou is in hegtenis geneem nadat sy ʼn bomdreigement gemaak het by die Oos-Londen-lughawe in die Oos-Kaap.

Kapt. Stephen Marais, woordvoerder van die polisie, sê die vrou het glo aan die lughawe se veiligheidspersoneel gesê dat sy ʼn bom in haar handsak het toe hulle haar gevra het om enige gevaarlike wapens of items in haar besit te verklaar. Marais sê die 27-jarige vrou het Vrydag die dreigement gemaak. Hy sê snuffelhonde en die polisie se plofstofeenheid het haar bagasie deursoek maar niks wat gevaarlik kan wees gevind nie. “Die polisie wil graag die publiek aanraai om nie bomdreigemente te maak nie aangesien dit ʼn ernstige oortreding is wat strafbaar is met ʼn boete of selfs tronkstraf.” Die vrou is in hegtenis geneem en sal Maandag in die Oos-Londen-landdroshof verskyn.