Vroue geterg oor minirokkies

Die Johannesburgse metropolisie het Vrydagaand twee jong vroue by ʼn taxistaanplek gered nadat ʼn skare mans hulle geterg het omdat hulle minirokkies gedra het.

ʼn Woordvoerder van die metropolisie, hoofsupt. Wayne Minnaar, sê hulle het van die voorval by die Noordstraat taxistaanplek te wete gekom deur kringtelevisiekameras. “Die twee vrouens is nie beseer nie. Die metropolisie het hulle na hulle huis in Bertrams geneem.” In 2008 het honderde vrouens, sommige geklee in minirokkies, ʼn optog na die Noordstraat taxistaanplek gehou uit protes teen die manier waarop taxibestuurders vroue behandel. Die optog het gekom nadat taxibestuurders vier vroue aangerand het, vermoedelik omdat hul minirokke gedra het. Die vroue moes glo kaal paradeer terwyl daar drank oor hulle uitgegooi is. Een van die vroue is glo onsedelik aangerand.