Die polisie het ʼn reuse soektog van stapel gestuur nadat vier mans ʼn inwoner van Welkom in die Vrystaat beroof en toe ontvoer het.
Kapt. Stephen Thakeng, woordvoerder van die polisie, sê die vier mans het Donderdagoggend by die man en sy vrou se huis ingebreek. “Die mans het elektriese goedere, juwele, drie selfone en kontant gevat waarna hulle die man met ʼn vuurwapen in ʼn motor gedwing en weggejaag het.” Thakeng sê die man se Soyat bakkie is ook gesteel. Die man se vrou is ongedeerd. Die polisie se soektog duur voort.
