Vyf mynwerkers is Saterdagaand by Gold Fields se Kloof-Driefontein-kompleks (KDC) in Carletonville dood nadat daar ʼn brand uitgebreek het.
Gold Fields sê in ʼn verklaring die vyf mynwerkers se name is nog nie bekendgemaak nie aangesien hulle naasbestaande nog in kennis gestel moet word. Veertien mynwerkers is in die hospitaal opgeneem vir observasie. ʼn Woordvoerder van die myn, Sharda Naidoo, sê die departement van minerale hulpbronne en die onderskeie vakbondverteenwoordigers is van die voorval in kennis gestel. “Bestuur betreur die voorval en het ʼn ondersoek van stapel gestuur. Die myn is tot verdere kennisgewing gesluit.”