Vyf mense is in hegtenis geneem nadat hulle glo ʼn huis naby Eshowe in KwaZulu-Natal aan die brand gesteek het en vyf mense verkool het.
“Die vyf persone, tussen 19 en 36 jaar oud, is Sondagoggend in hegtenis geneem en sal na verwagting Dinsdag in die Eshowe-landdroshof verskyn op aanklag van moord,” het kapt. Thulani Zwane, woordvoerder van die polisie, gesê.
Thulani sê vier huise is Saterdagaand in die Mbongolwane-gebied aan die brand gesteek. Thulisile Mnyango (50), Cebile Mnyango (21), Lungelo Mnyango (17), Mlamuli Mnyango (10) en die tweejarige Qiniso Mnyango het in een van die huise omgekom.
Die motief vir die aanval is nie bekend nie.