ʼn 34-jarige motorfietsryer is Woensdag op die pad tussen Kroonstad en Welkom in die Vrystaat deur ʼn weerligstraal getref.
Christo Venter, ʼn woordvoerder van ER24, het gesê paramedici, wat in die omgewing was, het die man langs die pad aangetref en besef iets is fout. “Hulle het stilgehou en die man het vir hulle gesê hy is deur ʼn weerligstraal getref,” het Venter gesê.
Die man het brandwonde en ander beserings opgedoen en is met ʼn ambulans na die Medi-Clinic in Welkom geneem vir verdere behandeling.