14 000 ontruim ná brand by Katar-inkoopsentrum

Foto: Facebook via Online Qatar

Foto: Facebook via Online Qatar

Ongeveer 14 000 mense moes Saterdag uit ʼn inkoopsentrum wat nog in aanbouing is in Doha, Katar, ontruim word nadat ʼn brand daar uitgebreek het.

Plaaslike owerhede het gesê hoewel die duisende werkers en personeel inderhaas uit die sentrum ter waarde van $825 miljoen ontruim moes word, is geen beserings aangemeld nie. Brandbestryders het glo ure lank gesukkel om die brand by die inkoopsentrum naby die Al-Rayan Sportklub aan die westelike buitewyke van die stad te blus.

Die Mall of Qatar wat al sedert 2012 in aanbouing is, sou volgens plan later vanjaar amptelik geopen word.

Beeldmateriaal en foto’s wat op sosiale media versprei is, het getoon hoe dik rookwolke bo die gebou hang. UrbaCon Trading & Contracting Co., die maatskappy wat die bou van die sentrum behartig, het Saterdag nie onmiddellik gereageer op versoeke vir kommentaar nie.

Die bestuur van die Mall of Qatar het in ʼn verklaring gesê die brand het omstreeks 14:30 ontstaan. “ʼn Ondersoek word gedoen en meer besonderhede sal bekendgemaak word sodra dit afgehandel is,” lui die verklaring.

Regeringsbeamptes in Katar het ook nie gereageer op ʼn versoek vir kommentaar nie.

ʼn Vorige brand in 2012 by die Villaggio-inkoopsentrum in Doha het die lewe van 19 mense geëis, van wie 13 kinders was. Die meeste oorledenes was ten tyde van die brand by ʼn dagsorgsentrum binne die inkoopsentrum. ʼn Ondersoek na die brand het aangedui dat ʼn elektriese fout die brand veroorsaak het, maar ook gemeld dat verskeie faktore tot die verspreiding daarvan bygedra het.

Vyf mense is in 2013 tronkstraf opgelê in verband met die voorval, maar hul skuldigbevindings is in Oktober verlede jaar deur ʼn appèlhof tersyde gestel.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

3 Kommentare

JA ·

Daar is nie so plek soos Katar op die wereld kaart nie. Dit is Qatar. Kan die mense wat dit skryf dit tog regkry.

Suné van Heerden ·

Dagsê JA

“Qatar” is inderdaad “Katar” in Afrikaans. Buitelandse eiename word in Afrikaans getranslitereer wanneer die twee tale nie dieselfde alfabet gebruik nie. In Engels word die naam, Влади́мир Влади́мирович Пу́тин, byvoorbeeld as “Vladimir Putin” gespel, en in Afrikaans “Wladimir Poetin”, of Горбачёв word as “Gorbachev” of “Gorbachyov” gespel, en in Afrikaans “Gorbatsjof”.

Groetnis
Suné
nms Maroela Media

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.