Minstens drie mense is dood ná ’n reuse-ontploffing by ’n residensiële gebou in die Spaanse hoofstad Madrid.
Volgens die owerhede is die ontploffing in die La Latina-woonbuurt deur ’n gaslekkasie veroorsaak.
Jose Manuel Franco, verteenwoordiger van die Spaanse regering, het Woensdag gesê ’n span werkers het die gebou se warmwatertenk ten tyde van die ontploffing herstel.
Plaaslike priesters word glo in dié sesverdieping-gebou gehuisves.
Franco het die voorval as ’n “gasontploffing” bestempel en gesê drie mense is dood. Een persoon word in dié stadium vermis en die dodetal kan moontlik styg.
Minstens een persoon het ernstige beserings gedurende die ontploffing opgedoen hoewel niemand in ’n naburige ouetehuis beseer is nie.
Nege brandweerspanne en 11 ambulanse is intussen na die toneel ontbied.
⚡️ Large explosion in a building rocks Madrid, Spain – reports pic.twitter.com/JYewVgJcie
— ivan (@ivan8848) January 20, 2021