Vyf mense is dood toe ’n verhittingspyp Maandag by ’n klein hotel in Rusland gebars en hotelkamers deur kokende water oorstroom is. Drie ander mense het brandwonde in die voorval opgedoen.
Mini Hotel Caramel, ’n hotel met nege kamers, word in die kelder van ’n huis in die stad Perm bedryf. Dié stad is naby die Oeral-bergreeks in Rusland geleë.
Volgens Oleg Melnitsjenko, ʼn amptenaar in die Russiese wetgewer, sal die plaaslike regering in die lig van die voorval ʼn verbod op die opening van hotelle en hostels in kelders moet oorweeg.
“Hostels moet nie in kelders bedryf word waar daar pypleidings is nie,” meen hy.
Die Russiese parlement het verlede jaar die bedryf van hostels of hotelle in woonstelle verbied.