9/11-slagoffer 17 jaar later uitgeken

Scott Michael Johnson (Foto: NY Daily News)

Die familie van ʼn 26-jarige analis kan uiteindelik berusting kry nadat sy oorskot byna 17 jaar, ná die aanvalle op 11 September 2001 by die Wêreldhandelsentrum, geïdentifiseer is.

Die lykskouer se kantoor in New York het Woensdag die slagoffer uitgeken as Scott Michael Johnson, ʼn werknemer van die beleggingsmaatskappy Keefe, Bruyette & Woods.

Hy is die 1 642ste slagoffer wat positief uitgeken is ná die terreuraanvalle waartydens 2 754 persone gesterf het toe kapers met vliegtuie in die handelsentrum ingevlieg het.

Die lykskouer het gesê hy kon Johnson se oorskot uitken danksy verbeterde DNS-toetse. Dit is die eerste nuwe slagoffer wat uitgeken is sedert Augustus 2017.

“Ons het in 2001 onsself daartoe verbind om alles in ons vermoë te doen, maak nie saak hoe lank dit neem nie, om hul geliefdes uit te ken,” het Barbara Sampson, hoof-lykskouer, in ʼn verklaring gesê.

Tom en Ann Johnson, Scott se ouers, het aan die New York Times gesê hulle het gehuil toe hulle die nuus kry oor hul seun se oorskot. “Mens is dadelik weer terug in die tragedie, maar dit beteken ook ʼn finaliteit. Op ʼn manier het ek altyd gedink hy sal dalk net een dag opdaag en sê, ‘hier is ek; ek het geheueverlies gehad’,” het Ann aan die koerant gesê.

Tot 40% van die slagoffers wat gesterf het se oorskot moet nog uitgeken word.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

13 Kommentare

jongste oudste gewildste
Lizzy

RIV..hoe traumaties moet dit wees om weer deur daardie pyn te gaan..maar tog berusting te kry na 17 jaar. Baie hartseer.

Juffie

Interessant die eye opener oor die DNS wat SO lank neem om ge-analiseer te word.
Ek dog dit is net in Suid Afrika die geval.

Anton

DNS of DNA?

lee

SJOE – dis maar ‘n laaang proses.
Nog 40 % van slagoffers om nog uit te ken, en ons hier in SA het waarskynklik al lankal van daai tragedie vergeet, en stoei net elke dag met ons eie dinge in hierdie deurmekaar land.

Henriette

1642ste…. nie 1642de nie