België-aanvalle: Selfmoordbom bevestig; grens tussen België en Frankryk gesluit

Persone vlug ná die ontploffings by Brussels-lughawe op 22 Maart 2016 (Skermskoot uit Twitter-video deur @AmichaiStein1)

Persone vlug ná die ontploffings by Brussels-lughawe op 22 Maart 2016 (Skermskoot uit Twitter-video deur @AmichaiStein1)

JONGSTE: Sputnik-nuusagentskap het intussen bevestig die grens is nie gesluit nie. LEES MEER
Die grens tussen Frankryk en België is Dinsdag gesluit ná bomontploffings in Brussel.

“Die Frans-Belgiese grens is gesluit en veiligheidsmaatreëls is ook opgeskerp by kernaanlegte in België,” het die plaaslike RTBF-uitsaaier berig.

Owerhede het Dinsdag die Belgiese hoofstad afgesper ná ontploffings by die Brussel-lughawe en ondergrondse treinstelsel.

Die Brussel-polisie het intussen ook bevestig daar is sterftes by die metrostasie, maar wou nie die aantal bekend maak nie. VRT-uitsaaier het berig 10 persone is dood by die metrostasie. Derniere Heure-koerant het intussen berig minstens 15 persone is dood by die Maelbeek-metrostasie.

Die Associated Press berig minstens 13 persone is dood by die lughawe.

Maroela Media het vroeër berig België het sy terreurwaarskuwing tot op sy maksimumvlak aangekondig en vliegtuie en treine word herlei en persone word beveel om te bly waar hulle is.

Lughawens dwarsoor Europa het hul veiligheid opgeskerp.

Reddingswerkers buite die metrotreinstasie in Brussels ná 'n ontploffing op 22 Maart 2016 (APTN via AP)

Reddingswerkers buite die metrotreinstasie in Brussel ná ‘n ontploffing op 22 Maart 2016 (APTN via AP)

Die staatsaanklaer se kantoor in Brussel het intussen bevestig dat dit ʼn terreuraanval van ʼn selfmoordbomplanter was. Dit kom ʼn paar dae ná die hoofverdagte in die aanvalle in November in Parys, Frankryk, in Brussel in hegtenis geneem is. Salah Abdeslam het aan owerhede gesê hy het ʼn nuwe netwerk gebou en beplan nuwe aanvalle.

Die dak by Brussel-lughawe het meegegee ná twee ontploffings die gebou geruk het. Ooggetuies het aan die Associated Press gesê een van die ontploffings was by die betaaltoonbank vir oortollige bagasie en die ander ontploffing naby ʼn Starbucks-kafee. Alle vlugte is gekanselleer.

Veiligheidsbeamptes in Europa was al weke lank gereed vir ʼn groot aanval, en het gewaarsku dat die Islamitiese Staat (IS) gereed maak vir ʼn aanval. Ná Abdeslam Vrydag in hegtenis geneem is, het die vrese toegeneem, aangesien ondersoekbeamptes daarop gewys het dat nog talle ander persone ook betrokke was in die aanvalle op 13 November toe 130 persone in Parys gesterf het. Talle van dié persone is nog op vrye voet.

Niemand het nog aanspreeklikheid aanvaar vir Dinsdag se aanvalle in Brussel nie.

Zach Mouzoun, wat 10 minute voor die eerste ontploffing van Genève geland het, het aan BFM-televisie gesê die plafon het met die tweede slag inmekaar gestort en van die waterpype het gebars. “Dit was verskriklik. Die plafonne het meegegee. Daar was oral bloed, beseerde mense, bagasie,” het hy gesê. “Ons het in die puin geloop, dit was soos ʼn oorlogstoneel.”

ʼn Tydelike behandelingsentrum is reeds in ʼn kroeg opgestel by die ingang na Maelbeek-stasie, naby die hoofkantoor van die Europese Unie. Verwarde en geskokte oggendpendelaars het uit die stasie gestroom terwyl die polisie probeer het om ʼn veiligheidsversperring te installeer.

“Die metro was besig om uit Maelbeek-stasie te vertrek op pad na Schuman toe daar ʼn groot ontploffing was,” het Alexandre Brans (32) gesê, terwyl hy bloed uit sy gesig gevee het. “Daar was oral paniek. Daar was baie mense in die metro.”

Francoise Ledune, woordvoerder vir Brussel Metro, het gesê daar was net een ontploffing by die treinstasie, in ʼn trok wat by Maelbeek gestop is.

https://youtu.be/3hY5Xl-MtvE

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

9 Kommentare

jongste oudste gewildste
EMK

Lafaards wat sulke dinge aan onskuldige mense doen. Lafaards!

Hennie

Als te danke aan Merkel en die EU met hul oop deur beleid!

Steven van Zyl

Kan jy asb jou bron bevestig wat sê dat daar enige grense gesluit is? Ek sien niks op die hoof nuss kanale nie, en die enogste bron wat ek opspoor is ‘n radiostasie en daar is geen manier om hulle stelling te bevestig nie.

Dankie

Piet Pompies

Geen persoon het die reg om ander se lewe te neem, hierdie is ‘n tragedie.

Jef

Nederlandse nuus bevestig dat hulle geen berig gewing gee oor die afsluit van grense nie, wel by verkillende grensposte verskerpte kontroles word uitgevoer,verder word geen verdere informasie verstrek nie.