Berugte juweledief (86) weer aangekeer

Doris Payne (Januarie 2016) Foto: AP Photo/John Bazemore, File

ʼn Berugte juweledief met ʼn misdaadloopbaan wat oor ses dekades strek, is weer aangekeer toe sy gesteel het.

Doris Payne (86) is Maandag by ʼn Walmart-winkel in hegtenis geneem nadat sy goedere ter waarde van $86.22 (ongeveer R1 100) gesteel het, het die Chamblee-polisie in Georgia, VSA, gesê.

ʼn Dokumentêre fliek oor Payne se lewe, The Life and Crimes of Doris Payne, het in 2013 verskyn. In ʼn onderhoud met The Associated Press in 2016 het sy ruiterlik erken sy was ʼn dief. Sy is ʼn bekende in juwelekringe en owerhede voer aan sy het al duur juwele uit winkels oor die wêreld heen gesteel.

Haar prokureur, Drew Findling, het egter gesê hierdie geval is anders. “Dit is in skrille kontras met die sake van die verlede. Ons praat nie hier van duur juwele nie. Dit is in hierdie geval dit wat ʼn 86-jarige vrou nodig het om daagliks te oorleef: kos en medikasie.”

Die polisieverklaring het nie besonderhede oor die goedere wat Payne glo wou steel nie.

Findling het gesê hy het na die polisieverklaring gekyk, maar hy moet nog kringtelevisiebeeldmateriaal bestudeer om te sien wat gebeur het.

Payne is in hegtenis geneem toe ʼn werknemer van Walmart ʼn veiligheidswag in kennis gestel het dat Payne sommige items in haar waentjie gelaai het, maar ander items in haar handsak en ʼn inkopiesak gelaai het.

Payne het vir die items in haar waentjie betaal, maar nie dit wat sy in haar handsak of inkopiesak gelaai het nie. Toe sy die winkel wou verlaat, het die veiligheidswag en werknemer haar voorgekeer.

Terwyl sy in die Chamblee-tronk was, het die polisiebeamptes ontdek dat sy ʼn elektroniese enkelmonitor dra, omdat sy vrygelaat is op parool ná ʼn vorige inhegtenisneming in DeKalb. Sy het in Maart skuld erken op ʼn aanklag van winkeldiefstal nadat owerhede gesê het sy wou in Desember 2016 ʼn halssnoer ter waarde van $2 000 (byna R26 000) van ʼn Von Maur-winkel steel.

Payne se enkelmonitor sou oor 10 dae verwyder word, maar sal nou waarskynlik na DeKalb geskuif word omdat sy die voorwaardes van haar parool oortree het.

Payne het in Wes-Virginia grootgeword en het as tiener saam met haar gesin na Ohio verhuis. Owerhede sê sy het al minstens 22 skuilname gebruik oor die jare heen en waarskynlik meer kere met diefstal weggekom as die kere wat sy gevang is. Die Jewelers’ Security Alliance het in die 1970’s reeds ʼn waarskuwing oor haar uitgereik.

Payne het aan AP gesê sy was nog ʼn kind toe ʼn vriendelike winkeleienaar haar toegelaat het om horlosies aan te pas en sy het toe vergeet dat sy die juwele dra. Sy het verduidelik sy het ontdek dat, indien iemand se aandag deur iets eenvoudig afgelei word, dit maklik is om met ʼn sieraad in haar hand te verdwyn. Haar misdaadloopbaan het in haar 20’s begin toe sy besef het dat sy finansieel sou kon oorleef deur juwele te steel.

[fvplayer src=”https://youtu.be/69xEABSq5O4″]

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

7 Kommentare

Annelie ·

Kanie glo daar was ‘n fliek oor haar gemaak nie – voorwaar iets om op trots te wees!

Johann Marx ·

Nou wanneer gaan daar in SA begin flieks gemaak word oor diewe? Die draaiboekskrywers sal nie kan voorbly nie…

Cherokee ·

re: $86.22 (ongeveer R1100)
Is julle seker daarvan dat jy Georgia vir $86.22 kan koop waarvoor jy hier R1100 betaal?
Die valuasie vergelykings is nie werklik van pas nie behalwe as jy Amerikaanse geld met Suid Afrikaanse geld sou koop. Wanneer ek dollars met rande koop betaal ek heelwat meer as dertig rand vir ‘n bier maar dit is nie die ervaring van mense wat vir dollars werk nie.

Jeannette ·

@Cherokee, nee – die berig sê nie sy kan “Georgia vir $82.66” koop nie, maar wel goedere – o.m. kos en medikasie – van $82.66 (ONGEVEER gelykstaande aan R1 100.00) by Walmart gegaps het. Ek dink nie mens kan enige van die state in die VSA sommer net “koop” nie en dan ook vir só spotgoedkoop?

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.