BLM-beweging vir Nobelprys benoem

Black Lives Matter (Foto: Facebook)

Die Black Lives Matter-beweging is benoem vir vanjaar se Nobelprys vir vrede.

Die beweging is reeds in 2013 in die VSA op die been gebring, maar het in Mei verlede jaar veral momentum gekry ná die dood van George Floyd in Minneapolis.

Talle betogers het ná Floyd se dood teen polisiebrutaliteit en rassisme in die VSA opgeruk waarna die  sogenaamde #BlackLivesMatter-betogings tot so ver as Engeland, Duitsland en Australië uitgekring het.

“Hierdie beweging het een van die sterkste bewegings wêreldwyd geword om rasse-onreg aan te spreek,” het die Noorweegse LP Petter Eide, wat die beweging vir die Nobelvredesprys benoem het, gesê.

Luidens mediaberigte word Eide intussen oorval met dreigemente en haatboodskappe oor dié benoeming. Hy is egter nie van plan om die benoeming terug te trek nie.

Die Black Lives Matter-beweging se benoeming vir die Nobelvredesprys volg kort nadat dit Vrydag die Sweedse Olof Palme-menseregteprys vir 2020 gewen het. Dié prys ter waarde van $100 000 word jaarliks toegeken deur die Olof Palme-gedenkfonds.

‘n Black Lives Matter-betoger met Paleis van Westminster in die agtergrond in Londen – 13 Junie 2020 (Foto: AP Photo/Kirsty Wigglesworth)

Volgens die prysorganiseerders word die Black Lives Matter-beweging vereer vir sy werk om vreedsame burgerlike ongehoorsaamheid teen polisiewreedheid en rassegeweld reg oor die wêreld te bevorder.

Luidens ’n verklaring het die Black Lives Matter-beweging “op ’n unieke manier die ontbering en pyn van die Afro-Amerikaanse minderheid, weens hul ongelykheid aan mense van ’n ander kleur, blootgelê.”

Die prysorganiseerders het verder daarop gewys dat sowat 20 miljoen mense aan die Black Lives Matter-betogings in die VSA en miljoene ander reg oor die wêreld deelgeneem het. “Dit illustreer dat rassisme en rassistiese geweld nie net ’n probleem in die Amerikaanse samelewing is nie, maar ’n wêreldwye probleem.”

Nominasies vir Nobelvredesprys

Tienduisende mense, waaronder LP’s en ministers van alle lande, voormalige Nobelpryswenners en vooraanstaande akademici, kan kandidate vir die verskillende Nobelpryse benoem.

Black Lives Matter-betogers gedurende ‘n betoging in Portland, Oregon – Julie 2020 (Foto: Noah Berger/AP)

Die sperdatum vir benoemings eindig Sondag.

Die WikiLeaks-stigter Julian Assange, voormalige Amerikaanse president Donald Trump en ’n trio opposisieleiers van Belarus onder leiding van Svetlana Tikhanovskaya, is reeds benoem. Die DA het ook intussen aangedui dat hy Suid-Afrikaanse gesondheidswerkers vir die 2022-Nobel-vredesprys gaan benoem. “Suid-Afrikaanse gesondheidswerkers veg nou al amper ʼn jaar lank heldhaftig teen die pandemie, dít midde ʼn gebrekkige gesondheidstelsel,” lees ʼn verklaring Dinsdag deur die DA.

Die Nobelpryse word aan die begin van Oktober aangekondig. Verlede jaar se Nobelprys vir Vrede is aan die Verenigde Nasies se Wêreldvoedselprogram (WVP) toegeken “vir sy pogings om hongerte te bekamp, ​​vir sy bydrae tot die verbetering van die toestande vir vrede in konflikgeteisterde gebiede en as ’n dryfveer in pogings om die gebruik van hongerte as ’n wapen van oorlog en konflik te voorkom.”

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

38 Kommentare

jongste oudste gewildste
Stefaan

WAT !!!

PATRICIA

Hoe is dit moonltlik? Hul vandaliseer en verwoes alles. VREDE? bid jou aan.

Willem

Nobelprys vir vrede???

Ou bees

Wow maar ons het nou al baie April fools dae gehad die jaar net een verskil hier dis waar en mal verby

Theo

Teken van eindtye… dinge wat verkeerd is word reg geag en dinge wat reg is word verkeerd geag. Die wereld is mal.