Chauvin gevonnis vir moord op George Floyd

Derek Chauvin hoor sy lot. (Foto: Skergreep van uitgesaaide vonnisoplegging/AFP)

Die voormalige Amerikaanse polisiebeampte Derek Chauvin is Vrydag tot 22 en ʼn half jaar tronkstraf gevonnis vir die moord op George Floyd.

Dít nadat die aanklaer in die saak aangevoer het dat Chauvin 30 jaar tronkstraf behoort te kry.

“Die vonnis is gegrond op jou misbruik van ʼn posisie van vertroue en gesag sowel as die spesifieke wreedheid teenoor George Floyd,” het regter Peter Cahill tydens die vonnisoplegging in ’n hof in Minneapolis gesê.

Chauvin is in April vanjaar skuldig bevind op al drie aanklagte teen hom: moord in die tweede en derde graad én manslag.

Maroela Media het vroeër berig Floyd is in Mei in Minneapolis dood nadat Chauvin langer as nege minute met sy knie op ʼn geboeide Floyd, wat op die grond gelê het, se nek gedruk het. Beeldmateriaal van die voorval het ʼn vlaag Black Lives Matter-veldtogte teen beweerde polisiewreedheid en rassediskriminasie in die VSA tot gevolg gehad.

“Ek wil my medelye met die Floyd-familie betuig,” het Chauvin gister voor die vonnisoplegging in die hof gesê nadat hy tydens sy verhoor van ses weke lank nie wou getuig nie.

“Weens ʼn paar addisionele regsaangeleenthede kan ek nie op die oomblik ʼn volledige, formele verklaring lewer nie. Daar sal in die toekoms nog ander inligting uitkom wat van belang sal wees en ek hoop dat dit julle gemoedsrus sal gee,” het Chauvin gesê.

Betogers in Minneapolis ná die vonnisoplegging. (Foto: Brandon Bell / GETTY IMAGES NORTH AMERICA / Getty Images via AFP)

Die Floyd-familie se regsverteenwoordiger het intussen die vonnisoplegging as ʼn “geskiedkundige” stap in die rigting van rasseversoening in die VSA bestempel.

Honderde mense het Vrydag naby die hofgebou saamgedrom waarvan baie van mening was dat Chauvin 30 of 40 jaar tronkstraf opgelê moes word.

Die Minnesota-wet maak in die geval van Chauvin voorsiening vir ‘n minimum vonnis van 12 en ’n half jaar tronkstraf maar ’n emosionele Terrence Floyd, George se broer, het aan die hof gesê Cahill moet Chauvin die strengste moontlike vonnis oplê.

Pres. Joe Biden het intussen gesê hoewel hy nie kennis dra van al die omstandighede wat voor die vonnisoplegging oorweeg is nie, kom Cahill se vonnis van Chauvin ingevolge die nodige riglyne van pas voor.

Cahill het gesê dat sy vonnis “nie gegrond is op emosie of simpatie nie”, maar die wet. ’n Aantal verswarende omstandighede wat ʼn swaarder straf meebring is in Cahill se vonnisoplegging van 22 bladsye geïdentifiseer.

Dit sluit in dat Chauvin se oortreding voor minderjariges gepleeg is en dat hy die misdaad as ʼn groep gepleeg het met die aktiewe deelname van minstens drie ander polisiebeamptes.

Dié polisiebeamptes se verhoor begin in Maart volgende jaar. Hulle word daarvan beskuldig dat hulle aandadig in Floyd se moord was.

Op grond van goeie gedrag sou Chauvin net twee derdes van sy vonnis kon uitdien voordat hy moontlik onder toesig vrygelaat kan word.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

40 Kommentare

jongste oudste gewildste
agnes

Dit is baie erg dat hy 221/2 jaar moet sit. Die vermoorde was n druggie en moeilikheidmaker. Dis onredelijk dat die Polisie so swaar bestraf word

Stephan

Dankie, ek hoop julle is nou klaar met die storie.

Hennie

Die straf pas glad nie by die ongeluk nie! Absurt! Dis jammer om te sien hoe die staat sy oppassers fail!

pestilensie

Ek sou graag wou sien dat hy n regverdige verhoor kry

Tipper

Wonder wat sal gebeur as daai 5000 blankes in Rhodesië nou gaan besluit hulle gaan nou op n rampage deur die strate en keer alles om,sal daar genade wees.