Covid-inenting nou wél vereiste vir Australiese Ope

Dit is moontlik dat Novak Djokovic nie sy titel in Januarie kan verdedig nie. (Foto: Vince Caligiuri/Tennis Australia/AFP)

Tennisspelers wat nie teen Covid-19 ingeënt is nie, sal nie aan volgende jaar se Australiese Ope in Victoria mag deelneem nie, het owerhede Woensdag bevestig.

Dié aankondiging is ʼn ommekeer van inligting wat vroeër vandeesweek in ʼn uitgelekte e-pos vervat is. Dit sal moontlik beteken dat Novak Djokovic, die wêreld se voorste manspeler, nie sy titel in Januarie by Melbourne Park kan verdedig nie.

Volgens die e-pos van die Vrouetennisvereniging wat uitgelek het, sou spelers wat nie teen die virus ingeënt is nie steeds kon deelneem indien hulle 14 dae in kwarantyn deurbring. Dít terwyl diegene wat ten volle ingeënt is relatiewe vryheid sal geniet en nie in verpligte kwarantyn hoef te gaan nie.

Scott Morrison, premier van Australië, het selfs gesê spelers wat nie ingeënt is nie, sal toegelaat word om die land in te gaan indien hulle ʼn vrystelling ontvang. Die gasheerstaat, Victoria, sal namens die spelers vir dié vrystelling moet aansoek doen.

Die premier van Victoria, Daniel Andrews, het nou gesê dat spelers dié vrystelling op hul maag kan skryf.

“Tans sluit ons mense wat nie ingeënt is nie uit kroeë, kafees, restaurante, sportterreine en allerhande ander geleenthede. Daarom gaan ons nie om vrystelling aansoek doen nie en is die kwessie basies opgelos,” sê hy.

Hoewel Australië se federale regering die land se grense beheer en visums uitreik, het staatsregerings tydens die pandemie onder meer kwarantynfasiliteite bedryf en entstofmandate opgelê wat dit onduidelik maak wie die laaste sê oor die reëls vir die Ope sal hê.

Melbourne is deel van die staat Victoria, wat Vrydag uit een van die wêreld se langste inperkings getree het. Daar was 260 dae van inperking sedert die pandemie uitgebreek het.

Djokovic, ʼn negemalige Australiese Ope-kampioen, is een van talle spelers wat weier om sy inentingstatus bekend te maak en dit het twyfel laat ontstaan oor die kwessie of hy sy titel gaan verdedig.

“Ek weet nie of ek na Australië gaan reis nie,” het hy verlede week aan die Serwiese koerant Blic gesê. Hy wou ook nie bekend maak of hy ingeënt is nie en sê dit is ʼn private kwessie.

Tennis Australië het intussen gesê hy is optimisties dat die Australiese Ope so na moontlik aan voor-pandemietoestande gehou sal word.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

25 Kommentare

jongste oudste gewildste
Herman

Novak staan by jou besluit. Dit bly n keuse. Of dit nou werk of nie is nie ter sprake nie. Dis n besluit en nie dwang nie. Kyk na Quinton en staan by jou besluit en regte.

Anel

Ek haal my hoed af vir hierdie atlete. Nou miet hulle indersteuners net die byeenkomste boikot om hul steun te wys. Kyk wie is dan die verloorders! Afgod sport of integriteit?

Tanja

Hoe kan dit wettig wees?

Misky

En steeds is daar mense wat dink hulle doen dit om burgers te beskerm en dis vir jou eie veiligheid. Diktatorskap in die ergste graad!!!!

Madeleine

Trots op hom!!