Die wêreld in foto’s – 20 September 2016

Foto’s bied ʼn blik op die wêreld wat nie noodwendig in woorde beskryf kan word nie. Beleef al die nuusgebeure, een foto op ʼn slag.

wêreld-foto

Roubeklaers by die begrafnis van Anjuma Beghum (18) wat dood is in die noordoostelike staat Assam in Indië toe inwoners van haar dorpie, Kuthori, en die polisie slaags geraak het nadat die owerheid 300 huise laat sloop het. Die huise is gesloop in ʼn poging om renosterstropery in die park stop te sit. Twee mense is dood en verskeie beseer. Foto: Anupam Nath / AP

wêreld-foto

ʼn Vlinder deel in die oes in die wingerd op die Thueringer Weingut Bad Sulza naby Sonnendorf in Duitsland. Die oes in die Saale-Unstrut-gebied, waar wyn al meer as 800 jaar gemaak word, het pas begin. Foto: Jens Meyer / AP

wêreld-foto

Pous Franciskus het Dinsdag ʼn dag van gebed om vrede saam met verteenwoordigers van verskeie godsdienste in Assisi in Italië deurgebring. Assisi is die tuisdorp van die heilige Franciskus wat onder meer verdraagsaamheid en bedagsaamheid verkondig het. Foto: L’Osservatore Romano / AP

wêreld-foto

Sigourney Weaver, die Amerikaanse rolprentster, Dinsdag by haar aankoms vir die 64ste San Sebastian-rolprentfees in Spanje. Weaver ontvang die Donostia-prys vir haar bydrae tot die bedryf op dié fees, een van die roemrykste rolprentfeeste in die Spaanssprekende wêreld. Foto: Alvaro Barrientos / AP

wêreld-foto

Koningin Maxima van Nederland Dinsdag tydens begrotingstoespraak in Den Haag. Koning Willem-Alexander het die regering se besteding vir die komende jaar voorgelê. Foto: Frank van Bleek / AP

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Het jy iets op die hart? Maroela Media se kommentaarfunksie is ongelukkig gesluit oor die Paasnaweek. Kom kuier gerus later weer!

Nuuswenke kan deur hierdie vorm gestuur word.