Diplomate onttrek wyl Taliban wag om beheer te neem

(Foto: AFP)

Die Taliban was Sondag op die rand van ’n totale oorwinning in Afghanistan, met sy vegters wat beveel is om aan die buitewyke van Kaboel te wag.

Die regering het toegegee dat hy hom voorberei op ’n oordrag van mag met Kaboel wat die enigste stad is wat nog onder regeringbeheer is.

Die Taliban sal vir die eerste keer in twee dekades weer in beheer van Afghanistan wees nadat die Amerikaanse weermag hom uit die kussings gelig het ná die terreuraanvalle van 11 September 2001 op Amerika.

President Ashraf Ghani, wat na verwagting binnekort sal bedank, het ’n beroep op die veiligheidsmagte gedoen om wet en orde te handhaaf. Duisende polisielede en ander gewapende lede is egter nie op hul pos nie en het hul uniforms en wapens oorgegee.

Die regering het aangedui dat onderhandelinge onderweg is om bloedvergieting in Kaboel te probeer verhoed en mag aan die Taliban oor te gee.

’n Woordvoerder van die Taliban het gesê hulle wil “in die komende paar dae” beheer oor Afghanistan neem. “Ons wil oor die volgende paar dae ’n vreedsame oordrag hê,” het Suhail Shaheen aan die BBC gesê.

Die Taliban het onder meer beheer van twee tronke naby Kaboel geneem en duisende gevangenes vrygelaat. Die Taliban se dreigende oorname het vrees en paniek onder inwoners van Kaboel veroorsaak. Inwoners het vir ’n tweede agtereenvolgende dag op banke toegesak om hul spaargeld te onttrek.

Die Taliban het die afgelope paar weke beheer oor al die groot stede geneem en duisende inwoners het reeds gevlug uit vrees vir die regering wat die Taliban moontlik daar sal stel wanneer hy beheer neem.

VSA onttrek diplomate

Pres. Joe Biden. (Foto: Saul Loeb / AFP)

Pres. Joe Biden het opdrag gegee dat ’n bykomende 1 000 Amerikaanse troepe ontplooi moet word om ambassadewerknemers en duisende Afghane wat vir Amerikaanse magte gewerk het, na veiligheid te neem.

Die afgelope paar dae is 3 000 Amerikaanse soldate ook ontplooi en was daar sowat 1 000 troepe in die land oor nadat Biden in Mei aangekondig het dat hy Amerikaanse troepe uit Afghanistan gaan onttrek na ’n millitêre teenwoordigheid van 20 jaar. Daar is gehoop om die proses teen 11 September te voltooi.

Biden se besluit loop intussen onder al meer kritiek deur. “Ek is die vierde president om die aanwesigheid van Amerikaanse troepe in Afghanistan te bestuur – twee Republikeine, twee Demokrate. Ek sou sal nie hierdie oorlog aan ’n vyfde [president] oorgee nie,” het Biden gesê.

Britse parlement dalk herroep

Die Britse premier, Boris Johnson, sal intussen poog om die parlement volgende week van sy reses te herroep oor die ontwikkelende krisis in Afghanistan.

Parlementslede sal waarskynlik teruggeroep word vir ’n dringende debat oor wat Brittanje, wat 457 troepe in die twee dekades lange oorlog verloor het, volgende moet doen, het bronne in Downing Street aan Sky News en die Press Association gesê.

Johnson het Vrydag beloof dat Brittanje nie sy rug op Afghanistan sal keer nie, kort nadat daar met ’n proses begin is om die meeste van sy ambassadepersoneel te onttrek. Brittanje het sowat 600 troepe ontplooi om sy nagenoeg 3 000 burgers te onttrek.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

20 Kommentare

jongste oudste gewildste
Hardekwas

Wel gedaan biden. Nog n monumentale ……

Tiptol

Ek sidder as ek die artikel lees. Wat is SA se toekoms? Voel of so iets vir ons wag.

Jacobus

Moet nooit Saigon vergeet nie. Biden, geskiedenis gaan jou swaar oordeel. Moenie dink jou soldate gaan jou óóit weer verdedig.

Pietertjie

Vietnam vers 2. Of is dit drie? Of vier?

Human

Trump het ‘n ooreenkoms met Taliban en Afgaanse regering onderteken, dat Amerikaanse magte einde Mei 2021 sal ontrek. Biden bly by die ooreenkoms. Die stommerike en kansvatters kan nou weer hulle bekke uitspoel om hulle self en diegene wat hul glo gelukkig te hou.