Djokovic hof toe oor dreigende deportasie

Novak Djokovic tydens ‘n 2021-besoek aan Melbourne se Brighton Beach. (Foto: Patrick Hamilton/AFP)

Novak Djokovic, die wêreld se voorste manstennisspeler, het hom Donderdag tot die hof gewend nadat Australië sy visum teruggetrek het omdat hy nie aan die land se toegangsbepalings voldoen het nie.

Die Serwiër het Woensdag in Australië aangekom, waarna immigrasiebeamptes hom ure lank by ʼn fasiliteit in Melbourne aangehou en toegang tot die land geweier het. Hy word in hierdie stadium steeds by ʼn immigrasie-aanhoudingsfasiliteit in die stad aangehou.

Volgens hofamptenare sal regter Anthony Kelly Djokovic se appèlaansoek teen sy dreigende deportasie aanhoor.

Djokovic het vroeër op Instagram gesê hy het kwytskelding gekry om sonder dat hy teen Covid-19 ingeënt is, aan die Australiese Ope deel te neem.

Die 34-jarige tennisster het voorheen geweier om sy inentingstatus bekend te maak, maar het al sy teenkanting teen inenting te kenne gegee. Hy het Covid-19 minstens al een keer opgedoen.

Scott Morrison, Australië se eerste minister, sê Djokovic het versuim om bewys van sy dubbele inenting of toepaslike mediese kwytskelding te lewer.

“Reëls is reëls en daar is geen spesiale gevalle nie,” het Morrison gesê.

Djokovic se regsverteenwoordigers het hulle nou tot die hof gewend in ʼn poging om hom in die land te hou.

Die nuus dat Djokovic in die land toegelaat sou word sonder dat hy teen Covid-19 ingeënt is, het ʼn herrie in Australië veroorsaak. Australiërs kon die grootste gedeelte van die afgelope twee jaar glad nie reis of familie en vriende van oorsee verwelkom nie weens die land se taai pandemiebeperkings.

Djokovic se behandeling het sy ondersteuners egter woedend en het ʼn sterk bewoorde diplomatieke teregwysing van Serwië se president tot gevolg gehad.

“Die hele Serwië staan by hom. Ons owerhede doen alles moontlik om te verseker die slegte behandeling van die wêreld se beste tennisspeler word so gou moontlik beëindig,” het pres. Aleksandar Vucic gesê nadat hy op die foon met Djokovic gesels het.

“In ooreenstemming met alle standaarde van internasionale reg, sal Serwië baklei vir Novak Djokovic, geregtigheid en die waarheid.”

Djokovic se pa het op sy beurt aangevoer sy seun is ure lank op die lughawe gevange gehou en moet met ʼn heldeontvangs terugkeer huis toe.

“Dit is ʼn stryd om ʼn vrye wêreld, nie net ʼn stryd vir Novak nie, maar vir die hele wêreld,” het hy gesê.

ʼn Serwies gebore Australiër het gesê Djokovic het ʼn burgeroorlog deurleef om tennis te speel. “Hy het niks aan die wêreld gedoen nie. As dit [Rafael] Nadal of [Roger] Federer was, sou niemand so ʼn ophef gemaak het nie.”

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

75 Kommentare

jongste oudste gewildste
Gompie

Hulle het jou visum terug getrek, hulle soek jou nie daar nie. Dis hulle reels nie joune nie. Maak vrede.

Baardman

Die artikel sê dit ook. Reëls is reëls. Maak nie saak of jy saamstem of nie. Kyk hoe lyk ons land van dubbele stelle reëls. Spreekwoord sê mos: As jy in Rome is, maak jy soos die Romeine.

krodedil

Novak is ‘n internasionale Rolmodel en ‘n stryder vir ‘n vrye wereld. Dankie dat jy nog opstaan vir ons regte. Jy is beslus ‘n Wereld Held. Pak op en gaan huis toe. Dis Australia se verlies.

Hendrik

Wel ek kan persoonlik ook nie sien hoekom ‘n gesonde jong man , wat ‘n 99% kans vir oorlewing indien hy Covid-19 opdoen en veral as die inenting nie aansteklikheid verhoed nie, ‘n inenting moet kry nie. Daaris kans om miokarditis of bloedklonte te kry van die inenting as newe effek. In Australie word newe effek slagoffers nou vergoed indien hulle die siektes verkry van die inenting.

Marius

Hy het al covid gehad, so sy natuurlike immunniteit is beter as die van ‘n persoon wat ‘n inenting gehad het. Beide kan nie verhoed dat jy weer covid nie en beide mag verhoed dat jy doodgaan van covid. Nou wat is die probleem australië ? Toets hom vir covid. As hy negatief is laat hom speel. Is dit so moeilik om logies te dink?