Duisende teken petisie ná klapper in hond se bek ontplof

Dit gaan na verwagting baie lank duur voor die hond ten volle herstel. Foto: Care2 Petitions

Meer as 180 000 diereliefhebbers wêreldwyd het ʼn aanlynversoekskrif geteken waarin hulle daarop aandring dat kinders wat ʼn hond mishandel het, berading kry.

Talle kinders in die stad San Lorenzo in die Suid-Amerikaanse land Paraguay was nie bloot tevrede om klappers op Oujaarsaand aan te steek nie, skryf die organiseerders van die petisie; daarom het hulle die vuurwerk op ʼn niksvermoedende hond gebruik.

Luidens berigte was die groep kinders met die vuurwerk aan die speel toe hulle ʼn hond gewaar het. Hulle het haar nadergelok en haar ʼn klapper aangebied wat toe reeds aangesteek was.

Soos honde maar maak, het sy die klapper in haar bek opgetel. Oomblikke later het dit ontplof en die hond met ernstige beserings gelaat.

ʼn Weldoener het die beseerde dier na ʼn veearts geneem, maar sy het talle frakture in haar bek opgedoen, wat lank sal vat om te genees.

Die organiseerders van die petisie meen al is die oortreders in dié geval kinders, wat gevolglik nie soos grootmense gestraf moet word nie, moet hulle dringend hulp kry om te keer dat hulle weer so iets aanvang met diere óf mense.

“Dis ʼn bewese feit dat mense wat diere mishandel dikwels daartoe oorgaan om mense te mishandel. Daarom is dit uiters belangrik dat amptenare hierdie kinders help verstaan dat hul optrede verkeerd was en hulle die berading te bied wat hulle nodig het.”

Die versoekskrif is Saterdag gesluit nadat die mikpunt van 200 000 handtekeninge bereik is.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

43 Kommentare

jongste oudste gewildste
Pietdw

Baie hardseer, maar niks teenoor wat hier op ons dorp Worcester, nuwejaar gebeur het nie. Ons lewe in ‘n siek wêreld! Lees bietjie die week se Worcester Standard.

Anoniem

Daai kinders kort ‘n deeglike pak slae!!! Watse nonsens is kamstige berading!!! Die hond kort berading! Hulle het baie goed besef wat die gevolge van hulle daad is. Sommer tronkstraf ook..

Oubaas

Voeg 10 000 van my handtekeninge by asb

marous

Petisies beteken niks . Foeter hulle pimpel en pers met ‘n rottang .

Niel

Verpligte doofstraf. Ja selfs vir kinders.