Elon Musk hof toe oor dáái twiet

Elon Musk. Foto: AP Photo/Evan Vucci, File

Elon Musk, die Suid-Afrikaanse gebore sakemagnaat, sal in Oktober verhoor word in verband met ʼn belediging wat hy ʼn Britse grotreddingswerker verlede jaar op Twitter toegesnou het.

ʼn Federale hofregter in Los Angeles het vandeesweek gesê die saak teen Musk sal op 22 Oktober begin nadat Musk se poging om die saak van die rol geskrap te kry misluk het. Vernon Unsworth het ʼn lastersaak teen Musk begin nadat die miljardêr hom ʼn “pedofiel” op sosiale media genoem het.

Unsworth was een van die reddingswerkers wat deel was van ʼn reuse-reddingspoging verlede jaar by die Tham Luang Nang Non-grot in Thailand se Chiang Rai-provinsie om 12 seuns en hul sokkerafrigter te red wat vir langer as twee weke deur vloedwater in die grot vasgekeer was.

Terwyl die reddingspoging aan die gang was, het Musk ingenieurs van Tesla en SpaceX na Thailand gestuur met ʼn miniduikboot wat hulle ontwerp het. Hy het aangevoer die duikboot sal werk om die seuns uit die grot te red. Die hoof van die reddingsoperasie het egter gesê die duikboot is nie prakties vir die operasie nie.

Unsworth was baie uitgesproke oor Musk se duikboot-voorstel en het daarna verwys as ʼn reklamefoefie. Maroela Media het vroeër berig Unsworth het in die onderhoud gesê “daar is absoluut geen kans” dat die duikboot kan werk nie, asook dat Musk geen begrip het van hoe dit in die grot lyk en wat die omstandighede van die reddingspoging is nie. Hy het verder gesê Musk “moet sy duikboot druk waar dit seermaak”.

Musk het woedend gereageer in ʼn reeks twiets waarin hy Unsworth ‘n “paedo” genoem het. Hy het later die belediging nog verder gevoer deur te twiet: “bet ya a signed dollar it’s true”, en het in verdere e-posse aan BuzzFeed daarop uitgebrei deur te beweer Unsworth het na Thailand verhuis “vir ʼn kinderbruid wat destyds 12 jaar oud was”.

Die Tesla-hoof het onder swaar kritiek deurgeloop vir sy woorde. Hy het later die omstrede twiets uitgevee en Unsworth om verskoning gevra.

Evening Standard berig Unsworth dagvaar Musk vir skadevergoeding van £58 000 (meer as R1 miljoen).

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

17 Kommentare

jongste oudste gewildste
Liberaal

Lliberales sal nie meer vryheid van spraak duld nie, nie as jy wit is nie. As julle nie daarvan hou nie, draai julle rug op liberale maatskappye wie se geld dit als aanblaas.

Hennie

Asof Elon nou reklame nodig het… Hy maak sy eie!

Griet

Ons SUKKEL maar om onse tonge te beheer en om onse monde te ZIPP op sosiale media…

Anida Visagie

Al is Musk beslis verkeerd, was dit nie nodig dat Unsworth so beledigend opgetree het nie. Sommige mense se ego’s – ai tog!

alwyn burger

Is Unsworth op soek na geldelike voordeel. Hy protesteer te hewig. Sy reaksie op Musk se aanbod van hulp is doodgewoon beledigend. Weet Musk dalk iets van hom? . Hoekom is Unsworth so op sy agterpote?