Facebook wil dalk naam verander

Mark Zuckerberg, Facebook

Facebook is luidens berigte van plan om sy maatskappy se naam volgende week te verander. Die naamsverandering het na bewering ten doel om die maatskappy se fokus op die bou van ’n sogenaamde meta‑heelal (metaverse) te weerspieël.

The Verge berig die sosialemediareus wil glo voortaan vir meer bekend staan as bloot ’n sosialemediaplatform.

Luidens die berig, waarin ’n bron “met direkte kennis” van die naamsverandering aangehaal word, beoog Mark Zuckerberg, uitvoerende hoof van Facebook, om die naamsverandering tydens die maatskappy se jaarlikse Connect-konferensie op 28 Oktober aan te kondig.

Dit is egter ook moontlik dat die naamsverandering vroeër aangekondig kan word.

Zuckerberg het in Julie reeds aan The Verge gesê Facebook sal in die komende jare “in wese oorgaan van ’n platform wat mense primêr as ’n sosialemedia-onderneming beskou na ’n meta-heelal-onderneming”.

’n Woordvoerder van Facebook wou egter nie vandeesweek op die beweerde naamsverandering kommentaar lewer nie.

Facebook sal nie die eerste bekende tegnologiemaatskappy wees om sy naam te verander namate sy planne uitbrei nie.

Google het hom in 2015 onder die sambreelmaatskappy Alphabet hergroepeer om aan te dui dat hy nie meer net ’n soekenjin is nie, maar ook uit maatskappye bestaan wat betrokke is by motors sonder bestuurders en gesondheidstegnologie.

Snapchat het op sy beurt in 2016 na Snap Inc. oorgeskakel. Die maatskappy het hom sedertdien as ’n “kameraonderneming” gevestig en sy eerste Spectacles-kamerabril bekendgestel.

Facebook kry tans die wind van voor nadat ʼn fluitjieblaser die maatskappy onlangs daarvan beskuldig het dat hy herhaaldelik wins bo die uitroei van haatspraak en disinformasie stel.

• Die term “meta-heelal” word gebruik om die konsep van ‘n toekomstige weergawe van die internet te beskryf wat in noue samewerking met die werklike wêreld is. Die term verwys na ʼn toekomstige voorgestelde virtuele kollektiewe gedeelde ruimte.