Foto's: Drie dood, talle beseer toe trein op snelweg beland

Reddingswerkers op die toneel. Foto: Pierce Co Sheriff / @PierceSheriff

Minstens drie mense is dood en talle beseer toe ŉ trein Maandag in Washington in die VSA ontspoor, gedeeltelik van ŉ brug af getuimel en op ŉ besige snelweg beland het.

Volgens berigte is van die beseerdes in ŉ kritieke toestand na hospitale geneem.

Die Amtrak-passasiertrein was vir die eerste keer op ŉ nuwe en vinniger roete van Seattle na Portland op pad toe dit naby Tacoma ontspoor het.

Die plaaslike polisie het aan verslaggewers gesê die oorsaak van die ontsporing moet nog vasgestel word.

“Enige teorieë oor die oorsaak van die ongeluk is slegs bespiegeling in dié stadium. Daar is nog niks amptelik beskikbaar nie,” het Ed Troyer, ŉ speurder, gesê.

Hy het gesê daar was 77 passasiers en vyf personeellede ten tyde van die ongeluk op die trein. Hy het gesê daar is ŉ moontlikheid dat die dodetal kan styg aangesien van die treinwaens nog nie veilig is om te deursoek nie.

Die trein het glo sewe voertuie getref. Geen motoriste is in die ongeluk dood nie.