‘n Video volg onderaan die berig. Minstens twee mense is Dinsdagaand beseer tydens ʼn reuseontploffing by ʼn Shell-olieaanleg in Nederland.
“Hulle het slegs geringe beserings opgedoen,” het streeksbeamptes op ʼn Twitter-rekening gesê. Die ontploffing het glo tydens ʼn skofverandering plaasgevind.
Jac Klijs, burgemeester van Moerdijk, suidoos van Rotterdam, waar die aanleg geleë is, het gesê die twee personeellede het brandwonde opgedoen. Hulle sal na verwagting Woensdag reeds uit die hospitaal ontslaan word.
Die oorsaak van die ontploffing is nog nie duidelik nie.
Inwoners het aan Omroep Brabant, die plaaslike radio- en televisienetwerk, gesê “twee kragtige skokke” het omstreeks 22:45 plaasgevind. “Die aarde het soos ʼn aardbewing geskud,” het die inwoners gesê. ʼn Reusevlam was kilometers ver van die perseel sigbaar maar Klijs het gesê die rook is nie gevaarlik nie.
Owerhede het wel inwoners aangeraai om binnenshuis te bly en die vensters op knip te hou.
Alle pad- en rivierverkeer naby aan die perseel is opgeskort.
Shell se 320 hektaar grootte chemiese aanleg vervaardig olie-gebaseerde chemikalieë wat onder andere in sintetiese vesels, verf en teenvriesmiddel gebruik word.
Die nuusagentskap HLN het Woensdagoggend om 05:00 berig die brand is nog nie onder beheer gebring nie. -SAPA