Ondersteuners van pres. Donald Trump het Woensdag die Kongresgebou in Washington bestorm.
Die betogers het deur die deure van die gebou gebars waar die kongres besig was om Joe Biden se oorwinning in die Amerikaanse presidentsverkiesing te bekragtig. Lede van die huis van verteenwoordigers en die senaat is deur polisiebeamptes uit die senaatsaal begelei.
Volgens berigte is ‘n persoon op die kongresgronde geskiet en gewond. Traangas is gebruik nadat die polisie en betogers slaags geraak het. Talle polisiebeamptes is glo beseer terwyl talle betogers reeds in hegtenis geneem is. Die Nasionale Wag is intussen ook ontplooi om die onluste te probeer bedwing.
Trump het sy ondersteuners op Twitter gevra om vreedsaam te betoog. “Geen geweld. Onthou ons is die party van wet en orde. Respekteer die wet en ons wonderlike mans en vroue in blou.”
Mike Pence, visepresident van die VSA, het intussen gesê alle Amerikaners het die reg om vreedsaam te betoog maar dat die “aanval” op die kongresgebou nie geduld sal word nie en dat alle betrokkenes aan die pen sal ry.