[Foto’s] Tientalle dood na staatsgreeppoging in Turkye

Foto: AP Photo/Emrah Gurel

Foto: AP Photo/Emrah Gurel

Minstens 60 mense is dood en honderde weermaglede in hegtenis geneem, na ʼn mislukte staatsgreeppoging in Turkye.

Lugaanvalle, militêre blokkades en gevegte tussen bendes en die gewapende magte is oornag oor groot dele van Turkye aangemeld. Soldate wat by die staatsgreeppoging betrokke was, se helikopter is oor die hoofstad, Ankara, deur ʼn vegvliegtuig afgeskiet.

Binali Yildrim, Turkye se eerste minister, het gesê orde is teen Saterdagoggend herstel. Hy het ʼn parlementêre sessie byeengeroep vir Saterdagmiddag. Beeldmateriaal wat op nuuskanale uitgesaai is, wys groot skade aan die parlementsgebou.

Foto: AP Photo

Foto: AP Photo

Pres. Recep Tayyip Erdogan het gesê diegene wat die staatsgreep gereël het, sal ʼn “swaar prys betaal vir hul verraad.” Hy het gesê die weermag sal “gereinig” word en “Turkye sal nie deur die weermag regeer word nie”.

Minstens 754 weermaglede is in hegtenis geneem, het die departement van justisie gesê. Vyf generaals en 29 kolonels is afgedank. ʼn Generaal, wat glo deel was van die staatsgreeppoging, is doodgeskiet. ʼn Tussentydse hoof is vir die weermag aangestel.

Beeldmateriaal op nuuskanale en sosiale media het gewys hoe soldate oorgee, nadat hul tenks gebruik het om die brûe tussen die Asiatiese en Europese kante van Istanboel te blokkeer.

Foto: AP Photo/Emrah Gure

Foto: AP Photo/Emrah Gure

Dit is nog nie duidelik wie presies die meesterbrein agter die staatsgreeppoging was nie.

Erdogan se regering loop deur onder kritiek oor toenemende outoritarisme en onderdrukking van die opposisie en media.

Vegvliegtuie het Saterdagoggend bomme naby die presidensiële paleis laat val en Erdogan het gesê daar is steeds ʼn “klein probleem” in die hoofstad.

Soldate het glo die Ataturk-lughawe in Istanboel oorgeneem en daar was vir etlike ure geen vlugte nie.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

39 Kommentare

jongste oudste gewildste
Eugene

Weereens kan ons net dankbaar wees dat sulke voorvalle nie in ons land plaasvind nie!! Baie afrikaners is altyd so krities hoe “sleg” ons land is! Eergister gebeure in Frankryk en nou in Turkye ens ens.

Smuts Ngonyama

Daar skrik Maroela uiteindelik wakker!

Smuts Ngonyama

En daar skrik Maroela UITEINDELIK wakker!

E.K.

Waar is die klomp wat so paar maande gelede Europa toe wou vlug? Dink hulle regtig nog dis beter en veral veiliger daar??

Andre

Eugene, ewig posiief of blind?
Guptas het lankal suksesvol n staatsgreep uitgevoer en jy is steeds veiliger in Istanboel as in jou sekuriteitskompleks agter al jou slotte.