Gaskrisis kan bier in Duitsland laat opdroog

(Argieffoto)

Die Duitse bierbedryf het tydens die Covid-19-pandemie reeds swaar getrek en ʼn verdere krisis staar die sektor nou in die gesig weens dreigemente dat Rusland sy gasuitvoere na die land kan verminder.

Energiepryse het die hoogte ingeskiet terwyl Rusland sy voorraad gas aan Duitsland verminder het en dit het tot vrese gelei dat ʼn akute tekort kan ontstaan indien die gastoevoer heeltemal opgeskort word.

“Sonder gas gaan die winkelrakke leeg wees,” het Holger Eichele, hoof van die Duitse Broueryfederasie, gewaarsku.

Volgens die Duitse federale statistiekkantoor, Destatis, is sowat 157,2 miljoen liter bier in die eerste ses maande van die jaar in Duitsland verkoop. Dit is ʼn toename van 3,8% vergeleke met die eerste ses maande van die vorige jaar.

Ondanks die styging was die verkoopsyfer in die eerste helfte van die jaar steeds 5,5% laer as die syfer wat die bedryf voor die pandemie bereik het.

Weens die dreigende gaskrisis het die federasie skrale hoop dat daar ’n verdere verbetering in bierverkope in die tweede helfte van die jaar gaan wees.

Brouers het die afgelope paar jaar hard gewerk om hul energieverbruik te verminder, maar dit was tot dusver “onmoontlik” om gas as die belangrikste energiebron vir die bedryf te vervang, het Eichele gesê.

Naas die chemiese bedryf is die voedsel- en drankbedryf Duitsland se grootste gebruiker van gas.

Bierbrouery behels ʼn hele aantal energie-intensiewe prosesse; van die rooster van die mout tot die verhitting van die tenks waarin die bier gebrou word.

Verskaffers soos die vervaardigers van glasbottels word boonop ook deur die stygende koste van energie geraak.