Foto’s: Grootste passasierskip nóg begin eerste vaart

The Symphony of the Seas (Foto: SBW-Foto)

Die grootste passasierskip wat die wêreld nóg gesien het, het pas Barcelona in Spanje verlaat vir sy eerste vaart rondom die Middellandse See.

CNN berig dié passasierskip – wat The Symphony of the Seas heet – spog met van die beste tegnologie wat nóg in passasierskepe was.

The Symphony of the Seas is onder andere die eienaar van die hoogste waterglybaan, die vinnigste internet op die oop waters en meer kunswerke as wat in die ganse Louvre-museum in Frankryk pryk.

Dié passasierskip is deur STX France gebou en is vroeër aan Royal Caribbean International afgelewer. Balwin Yeung, dié maatskappy se direkteur van verkope en bemarking, sê Royal Caribbean is trots op sy beste produk tot dusver.

Yeung sê die passasierskip is langer as 360 m, 66 m wyd, 70 m hoog en weeg nagenoeg 230 000 ton. Die skip spog met 22 restaurante, 24 swembaddens en 2 759 kajuite.

The Symphony of the Seas kan op een slag 6 680 gaste akkommodeer wat deur sowat 2 200 personeellede bedien en bygestaan word.

“Agt uit tien van die wêreld se grootste skepe behoort aan Royal Caribbean, maar dié skip is werklik ʼn baanbreker,” sê Yeung. “Passasiers sal nooit gedruk voel nie, want die skip spog met 18 dekke. Dis amper soos ʼn gebou – daar is ook 24 hysbakke en sewe ‘buurte’. Elke buurt het sy eie persoonlikheid, so die passasiers word op daardie manier van mekaar geskei.”

The Symphony of the Seas sal later vanjaar onder andere Palma de Mallorca, Spanje, Florence, Pisa, Rome, Napels, Florida, Miami en die Karibiese Eilande besoek.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

19 Kommentare

jongste oudste gewildste
Valerie

So ‘n bietjie oordrewe, die skip. Dis ook so ‘n groot dat ‘n mens seker ‘n paspoort benodig om rond te beweeg van plek tot plek (of trek ‘n mens op so ‘n groot ding?).
Miskien is ek maar net ‘n bietjie afgunstig.

Gustav

Wow, dit is ‘n ongelooflike skip. Lekker om van iets wonderlik te hoor vir ‘n slag

alwyn burger

Titanic !!?

Alwyn Burger

Santa

Wonder sal die skip ook na die Suid Afrikaanse waters vaar. Sal ook interessant wees om te hoor wat die kostes is om op die skip te reis.

Spike

Om op ñ groot passasierskip te wees is ñ belewenis. So ñ rukkie terug op die Sinfonia gewees.