Honderde grafte naby skool in Kanada ontdek

’n Nagwaak is vroeër die maand gehou ná die oorskot van 215 kinders in ongemerkte grafte in Brits-Kolombië ontdek is. (Foto: Cole Burston / AFP)

Honderde ongemerkte grafte is vandeesweek naby ’n voormalige Katolieke kosskool vir inheemse kinders in Saskatchewan in die weste van Kanada ontdek.

Internasionale media berig dat die oorskot glo hoofsaaklik aan kinders behoort.

Opgrawings om die perseel van die voormalige Marieval Indian Residential School het einde Mei begin nadat die oorskot van 215 leerders sowat ’n maand gelede by ’n ander voormalige Katolieke kosskool vir inheemse kinders in Kamloops, Brits-Columbië, ontdek is.

Luidens internasionale berigte het dié ontdekking skokgolwe deur Kanada gestuur en in samewerking met Kanadese owerhede tot opgrawings by verskeie voormalige kosskole vir inheemse kinders gelei.

Die Marieval-kosskool het leerders tussen 1899 en 1997 gehuisves voordat dit gesloop en met ’n dagskool vervang is.

Luidens berigte het sowat 150 000 inheemse kinders tot die laat 1990’s by soortgelyke kosskole tuisgegaan, waar hulle van hul gesinne, taal en kultuur geïsoleer is.

Talle leerders is glo fisiek, emosioneel en seksueel mishandel en volgens beriggewing het meer as 4 000 kinders in dié skole gesterf. ’n Kommissie van ondersoek het bevind dat Kanada “kulturele volksmoord” teen dié inheemse gemeenskappe gepleeg het.

Daar is sedertdien opnuut ’n beroep op die Pous en Katolieke Kerk gedoen om om verskoning te vra vir die mishandeling en geweld wat leerders by dié kosskole moes verduur, waartydens hulle “in die dominante kultuur ingedwing is”.

Perry Bellegarde, president van die Kanadese Vergadering van Eerste Nasies , sê die ontdekking is “absoluut tragies, maar nie verrassend nie”.

“Ek moedig alle Kanadese burgers aan om saam met Eerste Nasies gedurende hierdie ongelooflike emosionele tyd te staan.”

 

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

17 Kommentare

jongste oudste gewildste
Saartjievandiebosveld

The more I get to know people…the more I love my dog.

RS

Wat sal verskoning vra nou help? Die dade is klaar gepleeg jare terug.

Elize

Ek wonder soms hoekom die katolieke kerk nog volgelinge het? Die afskuwelike dade teen die mensdom in elke liewe land!!

Belinda

Ek dink hierdie katolieke mense het baie skeletons in hul closet… glad nie so holy soos mens dink nie.

Misky

Dis absoluut skokkend en klink soos ‘n opgemaakte fliek. Arme kinders….