Derduisende mense is ontwortel en minstens 52 dood weens erge reën wat tot vloede gelei het in Indië.
Die Indiese state Assam en Bihar is die swaarste getref met 26 mense wat in Assam dood is. Paaie en telefoondrade is beskadig en duisende is dakloos gelaat. Die Brahmaputra-rivier het in 18 van Assam se distrikte oorspoel.
Rajnath Singh, Indië se minister van binnelandse sake, het oor die naweek oor die gebiede wat die swaarste getref is gevlieg. “Ons doen alles wat ons kan om die mense te help, maar ons het ʼn plan nodig om sulke ernstige situasies die hoof te bied,” het Singh gesê.
Rampbestuur-owerhede het gesê nagenoeg twee miljoen mense word deur die vloede geraak. “Mense is vasgekeer in hul huise, het skade gelei aan hulle landerye en is dakloos gelaat”.
In Bihar is 350 tydelike kampe opgerig waar voedsel en ander benodighede voorsien word.
In die Kaziranga Nasionale Park in Assam is talle areas onder water en is die karkasse van ses skaars eenhoringrenosters reeds opgespoor. Nóg een is dood in ʼn ander nasionale park.
Vloede is ʼn jaarlikse verskynsel in Assam en ander dele van Indië tydens die Junie-September reënseisoen.
Nog reën word voorspel vir die volgende paar dae en die owerhede het die hulp van die weermag
aangevra.