Iran erken: Weermag hét vliegtuig neergeskiet

‘n Vrou rou buite ‘n gebou in Edmonton in Alberta in Kanada tydens ‘n nagwaak vir slagoffers van die vliegtuigongeluk buite Teheran. (Foto: Codie McLachlan/The Canadian Press via AP)

Iran het Saterdag aangekondig sy weermag het die Oekraïense straler wat verlede week neergestort het, per ongeluk neergeskiet. Al 176 mense aan boord is dood. Dít nadat die Irannese regering die afgelope paar dae herhaaldelik Westerse beskuldigings dat Iran verantwoordelik vir die tragedie is, ontken het.

Die vliegtuig is vroeg Woensdag neergeskiet, enkele ure nadat Iran ʼn missielaanval op twee weermagbasisse met Amerikaanse troepe in Irak gedoen het. Die aanval was uit weerwraak vir die dood van genl.maj. Kassem Soleimani in ʼn Amerikaans geleide lugaanval in Bagdad. Niemand is beseer in die aanval op die basisse nie.

Die Irannese weermag sê in ʼn verklaring wat deur staatsmedia vrygestel is die vliegtuig is per ongeluk aangesien vir ʼn “vyandige teiken” nadat dit na die “sensitiewe militêre sentrum” van die Revolusionêre Mag gedraai het. Die weermag was op sy “hoogste gereedheidsvlak” te midde van die verhoogde spanning met die VSA.

“In sulke omstandighede, weens ʼn menslike fout en op ʼn manier wat nie doelbewus was nie, is die vliegtuig getref,” het die weermag gesê.

Wrakstukke lê besaai oor ‘n stuk veld aan die buitewyke van Teheran. Iran het nou erken hy het die vliegtuig per ongeluk neergeskiet. (Foto: Ebrahim Noroozi/AP)

Hy het om verskoning gevra vir die ramp en gesê hy gaan sy stelsels opgradeer om toekomstige tragedies te voorkom.

Die weermag het ook gesê diegene verantwoordelik vir die voorval gaan vervolg word.

Iran se erkenning dat hy verantwoordelik is vir die voorval gaan waarskynlik openbare sentiment teen die owerhede laat opvlam, nadat Irannese ná Soleimani se dood aanvanklik laer getrek het rondom hul leiers. Die generaal is as ʼn volksheld beskou en duisende Irannese het opgeruk om hulde aan hom te bring.

Die meeste slagoffers op die vliegtuig was egter Irannese of Irannees-Kanadese en die voorval kom net enkele weke nadat die owerhede landwye betogings teen ʼn styging in brandstofpryse in die kiem gesmoor het.

“ʼn Hartseer dag,” het Iran se minister van buitelandse sake, Javad Zarif, getwiet.

“ʼn Menslike fout in ʼn tyd van krisis wat veroorsaak is deur Amerikaanse kragtoertjies het tot die ramp gelei. Ons diepste spyt, verskoning en medelye aan ons mense, die families van al die slagoffers en alle ander lande wat geraak word.”

Die straler, ʼn Boeing 737 wat bedryf word deur Ukrainian International Airlines, het Woensdag aan die buitewyke van Teheran neergestort kort nadat dit by die Imam Khomeini Internasionale Lughawe opgestyg het.

‘n Skemgreep van die video wat die vliegtuig se laaste oomblikke in die lug wys, asook hoe dit in ‘n vuurbal neerstort. (Skermgreep: UGC via AP)

Iran het dae lank ontken dat ʼn missiel die voorval veroorsaak het. Maar die VSA en Kanada, op grond van intelligensiebronne, het gesê hulle glo Iran het die vliegtuig neergeskiet – ʼn gevolgtrekking wat gesteun is deur video’s van die voorval.

Die vliegtuig was onderweg na die Oekraïense hoofstad Kiëf met 167 passasiers en nege bemanningslede aan boord. Slagoffers sluit in minstens 82 Irannese, 57 Kanadese en 11 burgers van die Oekraïne. Kanada het vroeër dié land se dodetal van 63 verminder.

“Dit is die regte stap vir die Irannese regering om verantwoordelikheid te aanvaar en die erkenning bring mense ʼn tree nader aan berusting,” het Payman Parseyan, ʼn vooraanstaande Irannees-Kanadees in Kanada, gesê. Verskeie van sy vriende het in die voorval omgekom.

“Ek dink die ondersoek sou dit [dat die vliegtuig neergeskiet is] aantoon, of hulle dit nou erken het of nie. Dit spaar hulle die verleentheid.”

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

61 Kommentare

jongste oudste gewildste
Jean

Hoekom als eers ontken…

ANÉ

Wat ñ puik voorbeeld, van Iran se zero integriteit van sy regering en zero militêre opgewassenheid om op “hoogste gereedheidsvlak” te wees! Wat ñ absolute skande en VERLEENTHEID!! ! Hoop húl wraaklus, is nou bevredig, of gaan hulle NÓG paar vliegtuie afskiet, om onskuldige bloed te vergiet…en DİNK hulle lieg daaroor.. ??

Sirkus

Kan nie Amerika blameer wat net ‘n terroris uitgehaal het vir jou eie onnodige aksies wat tot die dood van onskuldige mense gely het nie…

darem

Minstens het hulle die eerbare ding gedoen en dit erken, in plaas daarvan om dit onder die mat te probeer vee toe hulle besef dit is wel hulle wat die vliegtuig neergeskiet het.

As dit SA was, sou hulle aanhou lieg en toesmeer het tot ten einde van dae …

Griet

En nou…verstaan ek, SKIELIK die vriendskaplike bande, wat Sa met Iran het, soos gister berig is. Presies dieselfde vrot mentaliteite en integriteite! Beide LIEG… soos dit hulle beide pas, ongeag feite wat de teendeel bewys! Beide onderskat, die intelligensie van andere! Beide sit die blaam, altyd op iemand anders, vir hul eie onbevoegdheid!!