Iran ontken vliegtuig is neergeskiet

Wrakstukke Woensdag suidwes van Teheran, Iran. (Foto: Ebrahim Noroozi, AP)

“Boeing en al die lande wie se burgers aan boord was kan hul verteenwoordigers stuur om deel te neem aan die ondersoek na die vliegtuig se swartboks.”

Só het Ali Rabiei, woordvoerder van die Iranse regering, gesê. Hy het gereageer op Westerse lande se bewerings dat die Boeing 737 wat vandeesweek kort ná opstyging in Teheran neergestort het, per ongeluk deur Iran neergeskiet is.

Sky News berig Rabiei het die bewerings as “sielkundige oorlogvoering teen Iran” bestempel, en die deelname van ander lande, wie se burgers in die voorval gesterf het, in die ondersoek verwelkom.

Rabiei het ook ʼn beroep op die VSA gedoen om homself daarvan te weerhou om vals inligting oor die voorval te versprei.

Dít volg nadat die Amerikaanse president Donald Trump aan joernaliste in die Withuis gesê het hy glo dat Iran verantwoordelik is vir die voorval en verwerp Iran se aanvanklike bewering dat die Boeing weens ʼn meganiese probleem neergestort het.

Justin Trudeau. Foto: (Sean Kilpatrick/The Canadian Press via AP)

Ander Westerse leiers soos Justin Trudeau, eerste minister van Kanada, Boris Johnson, die Britse eerste minister, en Scott Morrison, eerste minister van Australië, steun dié vermoede.

Maroela Media het vroeër berig altesaam 176 mense is dood toe die Boeing 737 van Ukraine International Airlines Woensdagoggend neergestort het, enkele ure nadat Iran missiele op Amerikaanse teikens afgevuur het. Die vliegtuig was op pad na die Oekraïense hoofstad Kiëf met 167 passasiers en nege bemanningslede aan boord, onder wie 82 Iraniërs, minstens 63 Kanadese en 11 burgers van Oekraïne.

Trudeau sê nou Iran het aangedui dat hy die vliegtuig se swartboks in Iran sal hou, maar het aan die president van Oekraïne se ondersoekers toegang tot die boks belowe.

Volgens Trudeau sal sy regering nie rus voordat hy afsluiting rakende die tragiese voorval kry nie. Hy gee wel toe dat dit in dié stadium te vroeg is om vinger na iemand te wys of tot enige gevolgtrekkings te kom.

“Kanada werk saam met sy bondgenote om te verseker dat ʼn diepgaande ondersoek gedoen word, sodat ons die oorsake van hierdie tragiese ongeluk kan ontbloot,” het hy gesê.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

9 Kommentare

jongste oudste gewildste
Rooijan

En iemand het per ongeluk geweet om die missiel se afvuur in die nag te film.

Expat in die midde ooste

Sopas n video op sky news gesien waar die misiel die vliegtuig tref, Iran is skuldig, of dit doelgerig of n ongeluk was, dit sal ons nie weet nie. Meegevoel aan die families, dit moet n vreeslike skok en verlies wees

Marius

Hulle moet aanhou ontken daar sal n groot verrassing vir hulle wees as hulle nie met die waarheid uitkom.

John

Wie anders het dan die vliegtuig laat ontplof? Daar is volgens berigte drie flitse waargeneem. Tegnologie is deesdae baie meer gesofistikeerd as waarop Iran gehoop het. Baie sinistère planne is vir Irak en omstreke beplan. Die Demokrate met die oumens, Nancy, as leier se volgehou ondergrawing van Trump gaan nog erge nagevolge hè.

Bril

Vertel vir my liewerste, nes baie Amerikaners deesdae vra, en president Trump ook genoem het, wat soek die amerikaanse leer nou eintlik in Iran en in die Midde-Ooste? Die antwoord daarop is die sleutel tot die konflikte daarso. Wat steek agter die bewering dat die magtige amerikaanse oorlogsmasjienerie plaasvervanger oorloee vir Israel veg (Yinon plan).