Die Islamitiese Staat (Isis) het verantwoordelikheid aanvaar vir die ontploffings die afgelope naweek by ʼn katedraal in die suide van Filippyne wat die lewe van 20 mense geëis het.
Isis het ure ná die aanval deur sy Amaq-nuusagentskap aanspreeklikheid vir die ontploffings aanvaar. Isis het later ook ʼn direkte mediaverklaring uitgereik waarin hy beweer hy is verantwoordelik vir die aanval.
Die eerste ontploffing het tydens die Sondagoggenddiens in ʼn volgepakte Rooms-Katolieke katedraal in Jolo plaasgevind. Net toe regeringstroepe op die ontploffing reageer het, het ʼn tweede ontploffing in die parkeergebied afgegaan.
Minstens 15 lede van die publiek en vyf soldate is dood; 65 lede van die publiek, 14 soldate en twee polisiebeamptes is beseer. Die kerk se hoofdeur is vernietig en die houtkerkbanke en plafonne is ook beskadig.
Jolo is op ʼn gelyknamige eiland geleë wat dien as ʼn vesting van Abu Sayyaf, ʼn terreurgroep wat blameer word vir van die ergste bomontploffings en hoëprofiel-ontvoerings in die Filippyne.
Owerhede kon nog nie ʼn motief vir die ontploffing vasstel of enigsins bepaal of dit verband hou met ʼn volkstemming wat verlede week in die gebied gehou is om die skepping van ʼn nuwe outonome Moslem-streek te ondersteun nie.
Die siekste terroriste groep ooit! Hulle geniet dit om slegs ongewapende burgerlikes op die wreedste maniere te vermoor, hardloop egter uit hul skoen uit as weermagte teen hulle optree. Lafhartige optrede is kenmerkend van hulle!
Isis het min of geen openbare steun in SA nie. Maar, hoeveel Rand vloei daar jaarliks uit SA na Isis?
Isil sal ook verantwoordelikheid vat as n baksteen (wat jy vasgehou het) op jou toon val . Komieklik eintlik.